ઉત્તર કોરિયાના તાનાશાહ કિમ જોંગ ઉને પોતાની સેનાને અમેરિકા સામે લડવા માટે તૈયાર રહેવાનો આદેશ આપ્યો છે. રોયટર્સ અનુસાર, દેશની ન્યૂઝ એજન્સી કેસીએનએએ અહેવાલ આપ્યો છે કે કિમે બુધવારે એક મહત્વપૂર્ણ બેઠકમાં નવા વર્ષ માટે નીતિ માર્ગદર્શિકા પર બોલતા આ વાત કહી. તેમણે યુદ્ધની તૈયારીઓને વધુ તીવ્ર બનાવવા માટે પીપલ્સ આર્મી અને યુદ્ધસામગ્રી ઉદ્યોગ, પરમાણુ શસ્ત્રો અને નાગરિક સંરક્ષણ ક્ષેત્રો માટે કાર્યો નક્કી કર્યા.

સામ્રાજ્યવાદ વિરોધી સ્વતંત્ર દેશો સાથે મિત્રતા વધારશે- કિમ

મીટિંગ દરમિયાન, કિમે જણાવ્યું હતું કે ઉત્તર કોરિયા “સ્વતંત્ર વિરોધી સામ્રાજ્યવાદ” દેશો સાથે વ્યૂહાત્મક સહયોગનું વિસ્તરણ કરશે. બેઠકમાં કિમે નવા વર્ષ માટે આર્થિક લક્ષ્યાંક પણ નક્કી કર્યા હતા. તેમણે 5-વર્ષીય વિકાસ યોજનાને પૂર્ણ કરવા માટે 2024ને નિર્ણાયક વર્ષ ગણાવ્યું હતું. તેમણે નવા વર્ષ માટે મુખ્ય ઔદ્યોગિક ક્ષેત્રોમાં ગતિશીલ રીતે આગળ વધવા માટેના મહત્વપૂર્ણ કાર્યોની પણ સ્પષ્ટતા કરી હતી.

અગાઉ પણ તૈયારી કરવા આદેશો અપાયા છે

આ પહેલીવાર નથી જ્યારે કિમે પોતાની સેનાને યુદ્ધ માટે તૈયાર રહેવા કહ્યું હોય. આ પહેલા તેઓ અમેરિકા અને દક્ષિણ કોરિયા વચ્ચેના સંયુક્ત યુદ્ધ અભ્યાસ પર પણ નારાજ હતા. જણાવી દઈએ કે, ઉત્તર કોરિયા રશિયા સાથે તેના સંબંધો વધારી રહ્યું છે કારણ કે અમેરિકાએ યુક્રેન યુદ્ધ દરમિયાન પ્યોંગયાંગ પર રશિયાને સૈન્ય ઉપકરણોની સપ્લાય કરવાનો આરોપ લગાવ્યો છે. રશિયા કોરિયાની સૈન્ય ક્ષમતાઓને ટેક્નિકલ સહાય પૂરી પાડે છે.