બળાત્કારના કેસમાં સજા કાપી રહેલા આધ્યાત્મિક ગુરુ આસારામ બાપુને સુપ્રીમ કોર્ટમાંથી રાહત મળી નથી. તેણે કોર્ટ સમક્ષ સજા પર સ્ટે અને જામીનની માંગણી કરી હતી. સુપ્રીમ કોર્ટે તેની અરજી ફગાવી દીધી છે અને તેને જામીન માટે રાજસ્થાન હાઈકોર્ટનો સંપર્ક કરવા કહ્યું છે. કોર્ટે રાજસ્થાન હાઈકોર્ટને આ કેસની જલ્દી સુનાવણી કરવા પણ કહ્યું છે. આસારામે તબીબી આધાર પર વચગાળાના જામીન માંગ્યા હતા.
બે વખત જામીન અરજી ફગાવી દેવામાં આવી છે
આસારામના વકીલે સુનાવણી દરમિયાન કોર્ટને કહ્યું હતું કે મહારાષ્ટ્રમાં તેમની અટકાયત દરમિયાન તેમના અસીલને આયુર્વેદિક સારવાર કરાવવાની મંજૂરી આપવી જોઈએ. આના પર કોર્ટે રાજસ્થાન હાઈકોર્ટ સમક્ષ આ માંગ દાખલ કરવા પણ કહ્યું છે. જણાવી દઈએ કે, આસારામ બાપુએ આ પહેલા સપ્ટેમ્બર 2023માં પણ સુપ્રીમ કોર્ટમાં જામીનની માંગણી કરી હતી, જેને ફગાવી દેવામાં આવી હતી. રાજસ્થાન હાઈકોર્ટે પણ 2022માં જામીન આપવાનો ઈન્કાર કરી દીધો છે.
બાબા પર સુરત અને જોધપુરમાં છોકરીઓ પર બળાત્કાર કરવાનો આરોપ છે
આસારામ બાપુની 2013માં જોધપુરના આશ્રમમાં સગીર બાળકી પર બળાત્કાર કરવાના આરોપમાં ધરપકડ કરવામાં આવી હતી. આ પછી સુરતમાં બે બહેનોએ પણ તેની અને તેના પુત્ર નારાયણ સાંઈ સામે બળાત્કારનો કેસ દાખલ કર્યો હતો. જોધપુર કેસમાં 4 વર્ષ સુધી ટ્રાયલ ચાલી હતી અને 2018માં ટ્રાયલ કોર્ટે તેને દોષિત ઠેરવ્યો હતો અને તેને આજીવન કેદની સજા ફટકારી હતી. આસારામ બાપુ લાંબા સમયથી જ્યુડિશિયલ કસ્ટડીમાં છે.
