હાઈલાઈટ્સ
- ભારતના રાષ્ટ્રીય સુરક્ષા સલાહકાર અજીત ડોભાલ રશિયાની મુલાકાતે
- અજીત ડોભાલે રશિયન સમકક્ષ સર્ગેઈ શોઇગુ સાથે મુલાકાત કરી
- આ પ્રસંગે ડોભાલે શોઇગુ સાથે યુક્રેન યુદ્ધનો ઉકેલ શોધવા અંગે ચર્ચા કરી હતી
રશિયા અને યુક્રેન વચ્ચેના યુદ્ધને લઈને રશિયાના રાષ્ટ્રપતિ વ્લાદિમીર પુતિને હાલમાં જ કહ્યું હતું કે યુક્રેન સાથે યુદ્ધ માત્ર પીએમ નરેન્દ્ર મોદી જ રોકી શકે છે. ભારતે પણ આ વાતને સાચી સાબિત કરવાના પ્રયાસો શરૂ કરી દીધા છે. આ ક્રમમાં, ભારતના રાષ્ટ્રીય સુરક્ષા સલાહકાર અજીત ડોભાલ રશિયાની મુલાકાતે ગયા છે, જ્યાં તેમણે સેન્ટ પીટર્સબર્ગમાં વડા પ્રધાન નરેન્દ્ર મોદીના દૂત તરીકે તેમના રશિયન સમકક્ષ સર્ગેઈ શોઇગુ સાથે મુલાકાત કરી હતી.
આ પ્રસંગે ડોભાલે શોઇગુ સાથે યુક્રેન યુદ્ધનો ઉકેલ શોધવા અંગે ચર્ચા કરી હતી. ડોભાલે રશિયાને ભારતની ભૂમિકા વિશે પણ જણાવ્યું. રશિયામાં બ્રિક્સ દેશોના રાષ્ટ્રીય સુરક્ષા સલાહકારોની કોન્ફરન્સ યોજાઈ રહી હતી. આ કોન્ફરન્સ બાદ શોઇગુ અને ડોભાલ વચ્ચે બેઠક થઈ. નોંધનીય છે કે NSA ડોભાલની આ મુલાકાત વડાપ્રધાન નરેન્દ્ર મોદીની યુક્રેનની મુલાકાત બાદ થઈ છે. લગભગ અઢી અઠવાડિયા પહેલા, વડાપ્રધાન નરેન્દ્ર મોદીએ તેમની યુક્રેનની મુલાકાત દરમિયાન કહ્યું હતું કે યુક્રેન અને રશિયાએ પોતાનો સમય બગાડ્યા વિના બેસીને ચાલી રહેલા યુદ્ધનો અંત લાવવો જોઈએ.
પીએમ નરેન્દ્ર મોદીએ ફરી એકવાર સ્પષ્ટતા કરી કે ભારત યુદ્ધની શરૂઆતથી જ શાંતિના પક્ષમાં છે અને તેણે આ સંકટના શાંતિપૂર્ણ નિરાકરણમાં વ્યક્તિગત રીતે પણ યોગદાન આપવું જોઈએ. 1991 પછી પ્રથમ વખત કોઈ ભારતીય વડાપ્રધાન યુક્રેનની મુલાકાતે ગયા હતા.
નોંધનીય છે કે તાજેતરમાં જ રશિયાના રાષ્ટ્રપતિ વ્લાદિમીર પુતિને કહ્યું હતું કે ભારત, બ્રાઝિલ અને ચીનને સંભવિત મધ્યસ્થી તરીકે નામાંકિત કરવામાં આવ્યા છે. તેણે કહ્યું હતું કે, ભારત, ચીન અને બ્રાઝિલ એવા દેશો છે જેની સાથે હું હંમેશા સંપર્કમાં હતો. મને કોઈ શંકા નથી કે આ દેશોના નેતાઓ ખરા અર્થમાં રસ લેશે અને આ દિશામાં મદદ કરશે. ઉલ્લેખનીય છે કે વ્લાદિમીર ઝેલેન્સકી આ વર્ષના અંત સુધીમાં ભારતની મુલાકાતે આવી શકે છે.
