મહારાષ્ટ્રના જલગાંવમાં આગની અફવાને કારણે થયેલા ટ્રેન અકસ્માતમાં અત્યાર સુધીમાં ૧૩ લોકોના મોત થયા છે. આમાં 9 પુરુષો અને ચાર મહિલાઓનો સમાવેશ થાય છે. જલગાંવ સરકારી હોસ્પિટલના મેડિકલ સુપરિન્ટેન્ડેન્ટ ડૉ. વિજય ગાયકવાડે આ વાતની પુષ્ટિ કરી છે. ઘાયલોમાંથી ત્રણની હાલત અત્યંત નાજુક છે. આ બધાને સારવાર માટે પચોરાની સ્થાનિક હોસ્પિટલમાં દાખલ કરવામાં આવ્યા છે.

અહેવાલો અનુસાર, મૃતકોના મૃતદેહને પોસ્ટમોર્ટમ માટે જલગાંવની સરકારી હોસ્પિટલમાં મોકલવામાં આવ્યા છે. દરમિયાન, મહારાષ્ટ્ર સરકારે મૃતકોના પરિવારજનોને 5 લાખ રૂપિયાનું વળતર આપવાની જાહેરાત કરી છે.

આગ લાગવાની અફવા જીવલેણ સાબિત થઇ

એવું કહેવાય છે કે આ ઘટના બુધવારે મોડી સાંજે બની હતી જ્યારે લખનૌ-મુંબઈ પુષ્પક એક્સપ્રેસના મુસાફરો અચાનક એક કોચમાંથી ધુમાડો અને તણખા નીકળતા જોઈને ગભરાઈ ગયા હતા. તે સમયે સાંજના લગભગ ૫ વાગ્યા હતા. ધુમાડો જોઈને કોઈએ ટ્રેનની ચેઈન ખેંચી. આ કારણે ટ્રેન મુંબઈથી લગભગ 400 કિમી દૂર આવેલા માહેજી અને પરધાડે સ્ટેશનો વચ્ચે રોકાઈ ગઈ. ટ્રેન રોકાતાની સાથે જ મુસાફરોએ પોતાનો જીવ બચાવવા માટે ટ્રેનમાંથી કૂદી પડ્યા.

ટ્રેનમાંથી કૂદી પડનારા લોકો કર્ણાટક એક્સપ્રેસની અડફેટે આવી ગયા

પરંતુ, આ લોકો બેંગલુરુથી દિલ્હી જઈ રહેલી કર્ણાટક એક્સપ્રેસની અડફેટે આવી ગયા અને તેમાં અત્યાર સુધીમાં ૧૩ લોકોના મોત થયા છે. આ ઘટના પર દુઃખ વ્યક્ત કરતા રાજ્યના મુખ્યમંત્રી દેવેન્દ્ર ફડણવીસે કહ્યું કે કાચ કટર અને ફ્લડલાઇટ સહિત તમામ સાધનો તૈયાર રાખવામાં આવ્યા છે. અમે પરિસ્થિતિ પર સતત નજર રાખી રહ્યા છીએ. હું જિલ્લા વહીવટીતંત્રના સંપર્કમાં છું. તેમણે કહ્યું કે રાજ્ય સરકાર ઘાયલોને શક્ય તમામ સહાય પૂરી પાડશે.