ભારત સરકાર નૌકાદળ માટે AIP સબમરીન ડીલ માટે ઘણા દેશો સાથે વાતચીત કરી રહી હતી, જોકે હવે જર્મન કંપની TKMS એ ભારતીય AIP સબમરીનનો કોન્ટ્રાક્ટ મેળવી લીધો છે. જર્મન સંરક્ષણ કંપની થિસેનક્રુપ મરીન સિસ્ટમ્સ (TKMS) ભારતના મઝગાંવ ડોક શિપબિલ્ડર્સ લિમિટેડ (MDL) સાથે મળીને ભારતમાં છ AIP સબમરીન બનાવશે. આમ, 44 વર્ષ પછી એક જર્મન સબમરીન ભારતીય નૌકાદળના કાફલામાં જોડાઈ શકશે.

8 બિલિયન યુએસ ડોલરનો પ્રોજેક્ટ

વર્ષ 2021ની શરૂઆતમાં, જ્યારે ભારતીય નૌકાદળે ટેન્ડર બહાર પાડ્યું હતું, ત્યારે જર્મન કંપનીએ ભારત સાથે સહયોગમાં સબમરીન બનાવવામાં કોઈ રસ દાખવ્યો ન હતો. ભારતીય નૌકાદળ માટે 5.2 બિલિયન ડોલરના પ્રોજેક્ટ માટે થિસેનક્રુપ મરીન સિસ્ટમ્સ એમડીએલ સાથે સંયુક્ત રીતે બોલી લગાવશે. એવું કહેવામાં આવી રહ્યું છે કે આ પ્રોજેક્ટનો ખર્ચ 8 બિલિયન યુએસ ડોલર સુધી વધી શકે છે.

ભારત લાંબા સમયથી AIP ટેકનોલોજી મેળવવા માંગતું હતું

ભારત લાંબા સમયથી જર્મની, ફ્રાન્સ અને રશિયા પાસેથી આ મહત્વપૂર્ણ ટેકનોલોજી મેળવવાનો પ્રયાસ કરી રહ્યું છે. ૨૦૦૫માં, ભારતે છ સ્કોર્પિયન પરંપરાગત સબમરીનના નિર્માણ માટે ફ્રાન્કો-સ્પેનિશ કન્સોર્ટિયમ આર્મારિસ સાથે કરાર પર હસ્તાક્ષર કર્યા હતા. પાંચમી સ્કોર્પિયન-ક્લાસ સબમરીન જાન્યુઆરી 2023માં ભારતીય નૌકાદળમાં સામેલ કરવામાં આવી હતી. આ સબમરીનમાં AIP નથી, પરંતુ સ્થાનિક રીતે વિકસિત AIP ટેકનોલોજીથી તેમને રિટ્રોફિટ કરવાની યોજના ચાલી રહી છે.