કેન્દ્રીય પરિવહન મંત્રી નીતિન ગડકરીએ આજે તેમના ટ્વિટર હેન્ડલ પર એક વિડિયો શેર કર્યો છે, જેમાં ભારતના પ્રથમ આઠ-લેન એલિવેટેડ એક્સપ્રેસવે, નવા નિર્મિત દ્વારકા એક્સપ્રેસવેનું અનાવરણ કરવામાં આવ્યું છે. નીતિન ગડકરીએ કેપ્શન સાથે વિડિયો શેર કર્યો, “એન્જિનિયરિંગનો ચમત્કાર: દ્વારકા એક્સપ્રેસવે! ભવિષ્યમાં એક આધુનિક યાત્રા”
વિડીયો મુજબ દ્વારકા એક્સપ્રેસ વે 563 કિ.મી.ની લેન-પહોળાઈ સાથેનો ચાર-પેકેજ હાઈવે છે. આ રસ્તો નેશનલ હાઈવે 8 પર શિવ પ્રતિમાથી શરૂ થાય છે અને ગુરુગ્રામના ખેરકી દૌલા ટોલ પ્લાઝા પર સમાપ્ત થાય છે. આ ભારતનો પહેલો પ્રોજેક્ટ છે જેના માટે 1,200 વૃક્ષો રોપવામાં આવ્યા હતા. એકવાર પૂર્ણ થયા પછી, આ પ્રોજેક્ટ દિલ્હી અને હરિયાણા વચ્ચેની કનેક્ટિવિટીમાં નોંધપાત્ર સુધારો કરશે. વીડિયો અનુસાર દ્વારકાથી માનેસર સુધીની મુસાફરીનો સમય 15 મિનિટનો હશે, માનેસરથી ઈન્દિરા ગાંધી ઈન્ટરનેશનલ એરપોર્ટનો 20 મિનિટમાં, દ્વારકાથી સિંઘુ બોર્ડરનો 25 મિનિટમાં અને માનેસરથી સિંઘુ બોર્ડરનો 45 મિનિટનો સમય હશે. આ પ્રોજેક્ટ દ્વારકા, સેક્ટર 25 ખાતેના ઇન્ટરનેશનલ કન્વેન્શન સેન્ટર સાથે કનેક્ટિવિટી પણ મજબૂત કરશે.
જણાવી દઈએ કે એક્સપ્રેસ વેની બંને તરફ ત્રણ લેન સર્વિસ રોડ છે. ટ્રાફિકની ભીડને ટાળવા માટે આ સર્વિસ લેન પર એન્ટ્રી પોઈન્ટ બનાવવામાં આવ્યા છે. વીડિયો અનુસાર એક્સપ્રેસ વેના નિર્માણમાં બે લાખ ટન સ્ટીલનો ઉપયોગ કરવામાં આવ્યો છે, જે એફિલ ટાવરમાં વપરાતા સ્ટીલ કરતા 30 ગણો વધારે છે. આ સાથે પ્રોજેક્ટમાં 2 મિલિયન ક્યુબિક મીટર સિમેન્ટ કોંક્રીટનો ઉપયોગ કરવામાં આવ્યો છે, જે બુર્જ ખલીફામાં વપરાયેલ કરતા છ ગણો વધુ છે.
