મોદી સરકાર નાના ખેડૂતોને મોટી ભેટ આપવા જઈ રહી છે. 2024ની ચૂંટણીને ધ્યાનમાં રાખીને પીએમ નરેન્દ્ર મોદી ખેડૂતને આપવામાં આવતી વડાપ્રધાન કિસાન સન્માન નિધિની રકમ 6000 રૂપિયાથી વધારીને 8000 રૂપિયા કરી શકે છે. આ બાબતથી વાકેફ બે અધિકારીઓના જણાવ્યા અનુસાર, સરકાર નાના ખેડૂતોને વર્ષમાં ત્રણ હપ્તામાં આપવામાં આવતી પ્રધાનમંત્રી કિસાન સન્માન નિધિની રકમ 6,000 રૂપિયાથી વધારીને 8,000 રૂપિયા કરવાના વિકલ્પો પર વિચાર કરી રહી છે.
વડાપ્રધાન કિસાન સન્માન નિધિમાં આ અપડેટ અંગે નામ ન આપવાની શરતે આ અધિકારીઓએ ઈકોનોમિક ટાઈમ્સને જણાવ્યું કે આ મામલો હજુ વિચારણા હેઠળ છે. જો તેને પરવાનગી મળે છે, તો યોજના પર સરકારને વધારાના 20,000 કરોડ રૂપિયાનો ખર્ચ થશે. આ ચાલુ નાણાકીય વર્ષમાં માર્ચ 2024 સુધીના કાર્યક્રમ માટેના બજેટમાં રૂ. 60,000 કરોડ ઉપરાંત હશે. જોકે, નાણા મંત્રાલયના પ્રવક્તા નાનુ ભસીને આ અંગે ટિપ્પણી કરવાનો ઇનકાર કર્યો હતો.
ભારતમાં છેલ્લા 5 વર્ષમાં સૌથી નબળો ચોમાસું વરસાદ નોંધાયો છે, જેના કારણે આ વર્ષે મુખ્ય પાકોનું ઉત્પાદન નબળું રહી શકે છે. ડિસેમ્બર 2018માં સબસિડી કાર્યક્રમ શરૂ થયા બાદથી મોદી સરકારે 11 કરોડ લાભાર્થીઓને કુલ 2.42 લાખ કરોડ રૂપિયા આપ્યા છે. અધિકારીઓ હવે DBT પ્રોગ્રામ હેઠળ વધુ ખેડૂતોને સામેલ કરવા નિયમો હળવા કરવા અંગે ચર્ચા કરી રહ્યા છે. તેમણે કહ્યું કે આ દરખાસ્તો પર અંતિમ નિર્ણય લેવાનો બાકી છે. સરકાર ગરીબ પરિવારોને રાહત આપવા માટે અન્ય પગલાં પણ લઈ રહી છે, જેમ કે આવતા વર્ષે મફત અનાજ કાર્યક્રમનો વિસ્તાર કરવો અને નાના શહેરી આવાસ માટે સબસિડીવાળી લોન પર વિચાર કરવો.
