રશિયા અને ભારતની મિત્રતા વર્ષો જૂની છે અને બંને દેશોના નેતાઓ અવારનવાર મળતા રહે છે. પીએમ મોદી અને પુતિન વચ્ચે વાતચીત માટે ચર્ચા ચાલી રહી છે. રશિયાની રાજધાની મોસ્કોમાં ભારતના રાજદૂત પવન કપૂરે પુતિન અને પીએમ મોદી વચ્ચેની મુલાકાત પર કહ્યું છે કે, ‘ઉચ્ચ સ્તરની વાતચીત ચાલી રહી છે.’ પુતિન તાજેતરમાં યોજાયેલી G-20કોન્ફરન્સમાં આવ્યા ન હતા તેથી તેઓ હવે પીએમ મોદીને વ્યક્તિગત રીતે મળી શકે છે.
રશિયામાં ભારતીય રાજદૂત પવન કપૂરે રશિયન સમાચાર એજન્સી સ્પુટનિક સાથે આ બેઠક વિશે વાત કરી હતી. તેમણે કહ્યું છે કે મોસ્કો અને દિલ્હી આ વર્ષે વડાપ્રધાન નરેન્દ્ર મોદી અને રશિયન રાષ્ટ્રપતિ વ્લાદિમીર પુતિન વચ્ચે શિખર સંમેલનનું આયોજન કરવાની સંભાવના પર ઉચ્ચ સ્તરીય વાતચીતમાં વ્યસ્ત છે. નોંધનીય છે કે ગયા વર્ષે પશ્ચિમી મીડિયાએ એ વાતને હવા આપવાનું શરૂ કર્યું હતું કે પીએમ મોદીએ પુતિનને મળવાની ના પાડી દીધી હતી જો કે, સત્ય બિલકુલ વિપરીત છે.
પીએમ મોદી અને રશિયાના રાષ્ટ્રપતિ વ્લાદિમીર પુતિન અવારનવાર મળે છે. પુતિન અને પીએમ મોદી છેલ્લે ગયા વર્ષે સપ્ટેમ્બરમાં સમરકંદમાં મળ્યા હતા. છેલ્લા કેટલાક વર્ષોમાં અમેરિકા સાથે ભારતની મિત્રતા વધી છે, જેના કારણે ચર્ચાઓ શરૂ થઈ છે કે ભારત અને રશિયા હવે અલગ થઈ રહ્યા છે.આંતરરાષ્ટ્રીય મંચ ઉપરાંત, ભારત અને રશિયા દ્વિપક્ષીય રીતે પણ એકબીજાને મળતા રહે છે.તે જ સમયે, ક્રેમલિનના પ્રવક્તા દિમિત્રી પેસ્કોવે પશ્ચિમી મીડિયાના સ્પુટનિકના દાવા અંગે સ્પષ્ટતા આપી હતી. તેમણે કહ્યું કે 2022 ના અંત સુધી બંને નેતાઓ વચ્ચે કોઈ બેઠકની કોઈ યોજના નથી. કોઈ સુનિશ્ચિત વાતચીત ન હતી. તેમણે કહ્યું હતું કે 2023માં યોજાનારી નિર્ધારિત બેઠકો માટે બંને દેશો વચ્ચે સમજૂતી થઈ ગઈ છે. રશિયાના વિદેશ મંત્રાલયે પણ આ જ વાતનો પુનરોચ્ચાર કર્યો હતો.
