ભૂપેશ બઘેલે વડાપ્રધાન નરેન્દ્ર મોદીને પત્ર લખ્યો છે. મુખ્યમંત્રીએ વડાપ્રધાનને પત્ર લખીને ઓનલાઈન સટ્ટાના ગેરકાયદે કારોબાર પર પ્રતિબંધ મૂકવાની માગ કરી છે. ભૂપેશ બઘેલે પીએમ મોદીને સટ્ટાબાજીને રોકવા માટે તેનાથી સંબંધિત પ્લેટફોર્મ, વેબ એપીકે, ટેલિગ્રામ ઇન્સ્ટાગ્રામ URL વગેરે પર સંપૂર્ણ પ્રતિબંધ લાદવાની માગ કરી છે.
પીએમને આ સલાહ આપી
સીએમ બઘેલે પીએમ મોદીને સલાહ આપી છે કે સટ્ટાબાજીને રોકવા માટે તેનાથી સંબંધિત પ્લેટફોર્મ, વેબ, એપીકે, ટેલિગ્રામ, ઇન્સ્ટાગ્રામ, યુઆરએલ વગેરે પર સંપૂર્ણ પ્રતિબંધ લાદવો.
મહાદેવ એપ પર પ્રતિબંધ
ભૂપેશ બઘેલે પીએમ મોદીને પત્ર લખીને તમામ પ્લેટફોર્મ પર મહાદેવ એપ પર સંપૂર્ણ પ્રતિબંધ લગાવવાની માગ કરી છે. મુખ્યમંત્રીશ્રીએ જણાવ્યું હતું કે, હાલના સમયમાં ઓનલાઈન સટ્ટા અને ગેમીંગ દ્વારા ગેરકાયદેસર જુગાર અને સટ્ટાનો ધંધો દેશભરમાં ફેલાઈ ગયો છે અને તેના સંચાલકો અને માલિકો વિદેશમાંથી ગેરકાયદેસર ધંધો ચલાવી રહ્યા છે. બઘેલે વધુમાં કહ્યું કે, છત્તીસગઢ સરકાર અને રાજ્ય પોલીસ આ ગેરકાયદે ધંધાને લઈને શરૂઆતથી જ કડક કાર્યવાહી કરી રહી છે.
છત્તીસગઢ સરકારે મોટી કાર્યવાહી કરી
બઘેલે કહ્યું કે આ સંબંધમાં ઘણા લોકો સામે ફોજદારી કેસ નોંધવામાં આવ્યા છે અને તેમાં સામેલ આરોપીઓની ધરપકડ કરવામાં આવી છે અને તેમની સંપત્તિ જપ્ત કરવામાં આવી છે. માર્ચ 2022થી છત્તીસગઢ પોલીસ દ્વારા આ સંબંધમાં 90થી વધુ ફોજદારી કેસ નોંધવામાં આવ્યા છે જેમાં 450થી વધુ આરોપીઓની ધરપકડ કરવામાં આવી છે. બઘેલે એ પણ માહિતી આપી હતી કે રાજ્ય પોલીસે ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયને 80 પ્લેટફોર્મ, URL, લિંક્સ, એપ્સ પર પ્રતિબંધ મૂકવા માટે પત્ર લખ્યો છે.
