પાકિસ્તાનના અશાંત ખૈબર પખ્તુનખ્વા પ્રાંતમાં મંગળવારે આતંકવાદીઓએ પોલીસ સ્ટેશન પર હુમલો કરતાં ઓછામાં ઓછા ચાર સુરક્ષાકર્મીઓ માર્યા ગયા અને 16 ઘાયલ થયા. આતંકવાદીઓએ દક્ષિણ વઝિરિસ્તાન આદિવાસી જિલ્લાની સરહદે અશાંત ડેરા ઇસ્માઇલ ખાન જિલ્લામાં દરબન પોલીસ સ્ટેશન પર હુમલો કર્યો. આતંકવાદીઓએ પોલીસ સ્ટેશન બિલ્ડિંગમાં વિસ્ફોટકો ભરેલા વાહનને ઘુસાડ્યું અને પછી મોર્ટાર વડે હુમલો કર્યો.
પોલીસે જણાવ્યું કે હુમલા બાદ સુરક્ષા દળો અને હુમલાખોરો વચ્ચે ગોળીબારમાં ઓછામાં ઓછા ચાર સુરક્ષાકર્મીઓ માર્યા ગયા અને 16 ઘાયલ થયા. ‘ARY ન્યૂઝ’ ચેનલ અનુસાર, પોલીસે એન્કાઉન્ટર દરમિયાન બે આતંકવાદીઓને પણ ઠાર કર્યા હતા. પોલીસના જણાવ્યા અનુસાર હુમલા બાદ નવી પોલીસ ટુકડીઓ ઘટનાસ્થળે મોકલવામાં આવી હતી. હુમલાને કારણે જિલ્લાની હોસ્પિટલોમાં ઈમરજન્સી જાહેર કરવામાં આવી હતી જ્યારે તમામ શાળા-કોલેજો બંધ રાખવામાં આવી હતી.
અગાઉ નવેમ્બર મહિનામાં પણ પાકિસ્તાનના મિયાંવાલી એરબેઝ પર આત્મઘાતી હુમલો થયો હતો. પંજાબના મિયાંવાલીમાં પાકિસ્તાન એરફોર્સ બેઝમાં આત્મઘાતી બોમ્બર સહિત નવ ભારે હથિયારોથી સજ્જ આતંકવાદીઓ ઘુસ્યા હતા. બંને તરફથી ભારે ગોળીબાર થયો હતો, જેમાં 9 આતંકવાદીઓ માર્યા ગયા હતા.
