કેન્દ્રીય નાણા મંત્રી નિર્મલા સીતારમણે બુધવારે કહ્યું કે આઝાદીની 100મી વર્ષગાંઠ સુધીમાં ભારત વિશ્વની સૌથી મોટી અર્થવ્યવસ્થા ધરાવતો દેશ બની જશે. તેમણે કહ્યું કે 2028 સુધીમાં અમે પાંચ ટ્રિલિયનની અર્થવ્યવસ્થા ધરાવતા દેશોની યાદીમાં સામેલ થઈ જઈશું. આ સાથે આપણે 2047 સુધીમાં 30 ટ્રિલિયનની અર્થવ્યવસ્થા બની જઈશું.
નાણામંત્રીએ વાઈબ્રન્ટ ગુજરાત સમિટમાં આ વાતો કહી હતી. તેમણે કહ્યું કે 2027-28 સુધીમાં આપણે વિશ્વની ત્રીજી અર્થવ્યવસ્થા બની જવાની પૂરી સંભાવના છે. આપણો જીડીપી પાંચ ટ્રિલિયન ડોલરને પાર કરશે. પરિસ્થિતિ આના કરતાં વધુ સારી હોઈ શકે છે. અમે અત્યારે ન્યૂનતમ અંદાજો બનાવી રહ્યા છીએ. તે સ્થિતિમાં આપણે 5 ટ્રિલિયન ડોલરની અર્થવ્યવસ્થા બનીશું. તેમણે વધુમાં કહ્યું કે જો વિકાસની ગતિ ચાલુ રહેશે. અને બધુ બરાબર ચાલશે તો 2047 સુધીમાં આપણે 30 ટ્રિલિયન ડોલરની અર્થવ્યવસ્થા બની જઈશું.
હાલમાં દેશની અર્થવ્યવસ્થાનું કદ લગભગ 3.4 ટ્રિલિયન ડોલર છે. અત્યારે આપણે વિશ્વની પાંચમી સૌથી મોટી અર્થવ્યવસ્થા છીએ. પહેલા નંબરે અમેરિકા અને પછી ચીન, જાપાન અને જર્મની છે. નોંધનીય છે કે વર્તમાન નાણાકીય વર્ષ માટે દેશની અર્થવ્યવસ્થામાં અંદાજિત વૃદ્ધિ દર 7.3 ટકા રહેવાની ધારણા છે. ગયા નાણાકીય વર્ષમાં આ દર 7.2 ટકા હતો.
નાણામંત્રીએ વધુમાં કહ્યું કે વર્ષ 2000 થી 2023 સુધી એટલે કે છેલ્લા 23 વર્ષોમાં ભારતમાં સીધા વિદેશી રોકાણના રૂપમાં કુલ $919 બિલિયનની રકમ પ્રાપ્ત થઈ છે. તેમાંથી 65 ટકા રકમ એટલે કે લગભગ 595 અબજ ડોલર છેલ્લા આઠ-નવ વર્ષમાં આવી છે. એટલે કે વડાપ્રધાન નરેન્દ્ર મોદીની સરકારના કાર્યકાળમાં આવી છે.
