યુપીના ફતેહપુરમાં, એક મુસ્લિમ દંપતીએ સુંદરકાંડ અને હવન પૂજા સાથે હિન્દુ ધર્મ અપનાવ્યો. દંપતીએ જણાવ્યું કે તેઓ 25 વર્ષ પહેલા બનારસથી અહીં કામ માટે આવ્યા હતા. અહીં આવ્યા બાદ તેઓ એક મુસ્લિમ પરિવારના ઘરે રોકાયા હતા. તેમની સલાહ પર ઈસ્લામ અંગીકાર કર્યો હતો. હવે ફરી તેઓ સનાતની બન્યા છે. ફતેહપુરના હાથગામ પોલીસ સ્ટેશન વિસ્તારના અધારી ગામના રહેવાસી અબ્દુલ્લા અને તેની પત્ની ફાતિમાએ હિંદુ ધર્મ અપનાવ્યો છે અને પોતાનું નામ બદલીને શિવ પ્રસાદ અને પત્નીનું નામ કવિતા રાખ્યું છે. 25 વર્ષ પહેલા બનારસના રહેવાસી શિવ પ્રસાદ નોકરી માટે પત્ની કવિતા સાથે અધારી ગામમાં આવ્યા હતા. અહીં તેઓ મુસ્લિમ પરિવારના મકાનમાં ભાડે રહેવા લાગ્યા. અહીં તેણે મુસ્લિમ પરિવારની સલાહ પર ઈસ્લામ ધર્મનો સ્વિકાર કર્યો હતો.
છેલ્લા 6 મહિના પહેલા આ દંપતીએ અધારી ગામમાં પોતાનું મકાન બનાવ્યું હતું. આ દરમિયાન હિંદુ સંગઠનના લોકોનો સંપર્ક કરવામાં આવ્યો અને સમગ્ર વાત જણાવી. ત્યારબાદ મંગળવારે હિન્દુ સંગઠનના લોકોની હાજરીમાં ઘરમાં સુંદરકાંડના પાઠ કરવામાં આવ્યા હતા અને હવન કર્યા બાદ હિન્દુ ધર્મ અંગીકાર કર્યો હતો. બંને ખૂબ જ ખુશ દેખાતા હતા અને કહ્યું કે અમે ફરી સનાતની બની ગયા છીએ. શિવપ્રસાદે કહ્યું કે અમે સનાતની હતા, સનાતની જ રહીશું. જ્યારે કોઈ વ્યક્તિ ક્યાંક રહેવા લાગે છે અથવા કોઈ કામ કરવા લાગે છે, તો તેના કારણે તેના વાતાવરણમાં પરિવર્તન આવે છે, આવું થાય છે, આવી મજબૂરીઓ ઊભી થાય છે.
રામ દળના પ્રમુખ એજેન્દ્ર સાહુએ કહ્યું કે આપણા હિન્દુ સમાજમાંથી એક વ્યક્તિ કે જેણે 20 થી 25 વર્ષ પહેલા કેટલાક કારણોસર મુસ્લિમ ધર્મ અપનાવ્યો હતો. તેણે અમને 20 દિવસ પહેલા કહ્યું હતું કે તે સનાતન ધર્મમાં પાછા આવવા માંગે છે. અમે તેમને સુરક્ષા અને સંપૂર્ણ સહાય પૂરી પાડી. તે જે પણ કરી રહ્યો છે, તે સ્વેચ્છાએ કરી રહ્યો છે. અમારા તરફથી કોઈ દબાણ નથી. અમે તેમને એક પ્લેટફોર્મ આપી રહ્યા છીએ જેથી તેઓ આવી શકે. તેથી તેમના ઘરે સુંદરકાંડનું આયોજન કરવામાં આવ્યું છે.
