નવજાત બાળકોની તસ્કરીના મામલામાં CBIએ શુક્રવારે રાત્રે દિલ્હીમાં અનેક સ્થળોએ દરોડા પાડ્યા હતા. આ દરોડા દરમિયાન સીબીઆઈની ટીમે કેશવપુર વિસ્તારના એક ઘરમાંથી બે નવજાત બાળકોને બચાવ્યા હતા. કથિત રીતે આ બાળકોને વેચવાની તૈયારી કરવામાં આવી હતી. CBI હાલમાં આ મામલામાં બાળકો વેચનાર મહિલા અને તેમને ખરીદનાર વ્યક્તિની પૂછપરછ કરી રહી છે. સીબીઆઈએ એક મહિલા સહિત કેટલાક લોકોની અટકાયત કરી છે અને તેમની પૂછપરછ ચાલી રહી છે.
મીડિયા રિપોર્ટ્સને ટાંકીને કહેવામાં આવી રહ્યું છે કે સીબીઆઈના દરોડા દરમિયાન 7-8 નવજાત બાળકો મળી આવ્યા હતા. દિલ્હીના કેશવપુરમ વિસ્તારમાંથી બે નવજાત બાળકોને પણ બચાવી લેવામાં આવ્યા છે. ગઈકાલ સાંજથી અનેક જગ્યાએ આ દરોડા પાડવામાં આવી રહ્યા છે.
હજુ સુધી સીબીઆઈ દ્વારા આ મામલે કોઈ સત્તાવાર માહિતી કે નિવેદન જારી કરવામાં આવ્યું નથી. માનવામાં આવી રહ્યું છે કે સંપૂર્ણ તપાસ બાદ આ કેસમાં ચાઈલ્ડ ટ્રાફિકિંગના મોટા નેટવર્કનું અસ્તિત્વ બહાર આવી શકે છે. આ પછી ઘણા લોકોની ધરપકડ થઈ શકે છે. એવું કહેવામાં આવી રહ્યું છે કે પકડાયેલા લોકો હોસ્પિટલોમાંથી નવજાત શિશુઓની ચોરી કરતા હતા અને પછી તેને મોટી રકમમાં જરૂરિયાતમંદ યુગલોને વેચતા હતા.
