IMDએ જણાવ્યું હતું કે પોરબંદર, જૂનાગઢ, દેવભૂમિ દ્વારકા અને અમરેલી જિલ્લા સહિત દક્ષિણ ગુજરાત અને સૌરાષ્ટ્રના ભાગોમાં આગામી બે દિવસમાં ભારેથી અતિભારે વરસાદની સંભાવના છે.
હાઈલાઈટ્સ :
- ગુજરાતમાં છેલ્લા 24 કલાકમાં 122 તાલુકામાં વરસાદ
- દ્વારકામાં સૌથી વધુ 15 ઇંચ વરસાદ પડ્યો
- પોરબંદરમાં સતત વરસી રહ્યો છે વરસાદ,વધુ 10 ઇંચ વરસાદ
- પોરબંદરમાં છેલ્લા 48 કલાકમાં કુલ 25 ઇંચ વરસાદ
- જૂનાગઢના કેશોદમાં 8-5 અને વંથલીમાં સવા સાત ઇંચ વરસાદ
- દ્વારકાના કલ્યાણપુરમાં 6-5 ઇંચ વરસાદ ,
- વલસાડના ઉમરગામમાં પણ 6-5 ઇંચ વરસાદ
- દ્વારકાના ખંભાળિયામાં 5 ઇંચ વરસાદ
- પોરબંદરના રાણાવાવ માં 4-5 ઇંચ વરસાદ
ગુજરાતના પોરબંદર, જૂનાગઢ અને દેવભૂમિ દ્વારકા જિલ્લામાં શુક્રવારે (19 જુલાઈ) સાંજે 6 વાગ્યા સુધી છેલ્લા 36 કલાકમાં ભારે વરસાદ પડ્યો હતો. પોરબંદર તાલુકામાં આ સમયગાળા દરમિયાન 565 મીમી વરસાદ નોંધાયો છે. હવામાન વિભાગનું કહેવું છે કે પોરબંદરમાં આગામી ચાર દિવસમાં ભારે વરસાદની સંભાવના છે.
તેમણે કહ્યું કે, ભારે વરસાદને કારણે આ જિલ્લાઓના ઘણા વિસ્તારોમાં પાણી ભરાઈ ગયા હતા, જેના કારણે કેટલાક રસ્તાઓ અને પુલ અને બંધ થઈ ગયા,વાહનવ્યવહાર ખોરવાઈ ગયો હતો અને લોકોને ઘણી સમસ્યાઓનો સામનો કરવો પડ્યો હતો. સ્ટેટ ઇમરજન્સી ઓપરેશન સેન્ટર દ્વારા બહાર પાડવામાં આવેલા આંકડા મુજબ, છેલ્લા 36 કલાકમાં સાંજના 6 વાગ્યા સુધી સૌરાષ્ટ્રના પોરબંદર તાલુકામાં સૌથી વધુ 565 મીમી વરસાદ નોંધાયો છે.
આ પછી દેવભૂમિ દ્વારકાના કલ્યાણપુર તાલુકામાં 412 મીમી, જૂનાગઢના કેશોદ તાલુકામાં 401 મીમી, વંથલીમાં 353 મીમી અને પોરબંદરના રાણાવાવમાં 330 મીમી વરસાદ નોંધાયો છે. પોરબંદર જિલ્લા મેજીસ્ટ્રેટ કે.ડી. લાખાણીએ મીડિયાને જણાવ્યું હતું કે “ભારે વરસાદ અને દરિયાકાંઠાના વિસ્તારની ભૌગોલિક સ્થિતિને કારણે ઘણા નીચાણવાળા વિસ્તારોમાં પાણી ભરાઈ ગયા છે. કેટલાક લોકોને સલામત સ્થળે ખસેડવામાં આવ્યા છે. સ્થિતિ નિયંત્રણમાં છે અને અધિકારીઓ સતર્ક છે.” ”
આગામી બે દિવસ ભારે વરસાદની આગાહી
ભારતીય હવામાન વિભાગ (IMD) એ જણાવ્યું કે પોરબંદર, જૂનાગઢ, દેવભૂમિ દ્વારકા અને અમરેલી જિલ્લા સહિત દક્ષિણ ગુજરાત અને સૌરાષ્ટ્રના ભાગોમાં આગામી બે દિવસમાં ભારેથી અતિભારે વરસાદની શક્યતા છે. IMDએ જણાવ્યું હતું કે ઉત્તરપૂર્વીય અરબી સમુદ્ર અને નજીકના સૌરાષ્ટ્ર વિસ્તારમાં ચક્રવાતી પરિભ્રમણને કારણે ગુજરાતમાં ચોમાસું સક્રિય છે.
પશ્ચિમ રેલવેના ભાવનગર ડિવિઝનના પોરબંદર-કાનાલુસ વિભાગમાં ભારે વરસાદને કારણે પોરબંદર જતી અને આવતી ટ્રેનોને અસર થઈ છે. સ્થાનિક વહીવટી તંત્રની મદદથી 250 જેટલા મુસાફરોને બસ મારફતે ભાણવડથી પોરબંદર ખસેડવામાં આવ્યા છે. ભારે વરસાદના કારણે વાહનવ્યવહારને પણ અસર થઈ છે. લોકોને અનેક પ્રકારની સમસ્યાઓનો સામનો કરવો પડી રહ્યો છે.
