હાઈલાઈટ્સ :
- કોલકાતા રેપ-મર્ડર કેસની આજે સુપ્રીમ કોર્ટમાં ફરી સુનાવણી
- સુપ્રીમ કોર્ટમાં CBIનો સ્ટેટસ રિપોર્ટ રજૂ કર્યા અનેક ઘટસ્ફોટ
- સ્ટેટસ રિપોર્ટ સીલબંધ કવરમાં સર્વોચ્ચ અદાલત સમક્ષ સુપરત
- ક્રાઈમ સીન સાથે ચેડા કરવામાં આવ્યા હોવાનો CBIનો દાવો
- CBIના સ્ટેટસ રિપોર્ટમાં કોલકાતા પોલીસની બેદરકારીનો ઉલ્લેખ
- સ્ટેટસ રિપોર્ટમાં કહેવામાં આવ્યું હતું કે ક્રાઈમ સીન સાથે ચેડા થયા
- પીડિતાના અંતિમ સંસ્કાર બાદ મામલામાં FIR નોંધવામાં આવી હતી
સેન્ટ્રલ બ્યુરો ઑફ ઇન્વેસ્ટિગેશન એટલે કે CBI અને કોલકાતા પોલીસે તેમના સંબંધિત સ્ટેટસ રિપોર્ટ સીલબંધ કવરમાં સર્વોચ્ચ અદાલત સમક્ષ સુપરત કર્યા છે.
CBIએ પોતાના સ્ટેટસ રિપોર્ટમાં કોલકાતા પોલીસની બેદરકારીનો ઉલ્લેખ કર્યો છે.સ્ટેટસ રિપોર્ટમાં કહેવામાં આવ્યું હતું કે ક્રાઈમ સીન સાથે ચેડા કરવામાં આવ્યા છે.માત્ર કેસને ઢાંકવાનો પ્રયાસ કરવામાં આવ્યો હતો અને પીડિતાના અંતિમ સંસ્કાર બાદ મામલામાં FIR નોંધવામાં આવી હતી.
કોલકાતા રેપ-મર્ડર કેસની આજે સુપ્રીમ કોર્ટમાં ફરી સુનાવણી થઈ.આ દરમિયાન સુપ્રીમ કોર્ટે વિરોધ કરી રહેલા ડોક્ટરોને ફરજ પર પાછા ફરવાની અપીલ કરી હતી. સુપ્રીમ કોર્ટે કહ્યું કે લોકો તમારી રાહ જોઈ રહ્યા છે. જો તમે ફરજ પર પાછા નહીં ફરો તો કામ કેવી રીતે થશે?
રિપોર્ટમાં કહેવામાં આવ્યું છે કે પીડિતાના પરિવારને આ ઘટનાની જાણકારી મોડેથી આપવામાં આવી હતી. પરિવારને સૌ પ્રથમ આત્મહત્યાની જાણ કરવામાં આવી હતી,અહેવાલમાં સ્પષ્ટપણે કહેવામાં આવ્યું છે કે આ જઘન્ય ઘટનાને ઢાંકવાનો પ્રયાસ કરવામાં આવ્યો હતો.સાથે જ CBIના સ્ટેટસ રિપોર્ટમાં હોસ્પિટલ પ્રશાસનનું ઉદાસીન વલણ પણ સામે આવ્યું છે.
20 ઓગસ્ટના રોજ સુપ્રીમ કોર્ટે આરજી કાર કોલેજની ઘટના પર સુઓ મોટુ સંજ્ઞાન લીધું હતું અને સુનાવણી કરી હતી. આ જ સુનાવણી દરમિયાન કોર્ટે સીબીઆઈ અને બંગાળ સરકારને આ ઘટનાની તપાસ અંગેનો સ્ટેટસ રિપોર્ટ કોર્ટમાં રજૂ કરવાનો નિર્દેશ આપ્યો હતો.
મંગળવારે સુનાવણી દરમિયાન સુપ્રીમ કોર્ટે કોલકાતાની આરજી કાર મેડિકલ કોલેજમાં બનેલી ઘટના પર ગંભીર ચિંતા વ્યક્ત કરી અને ડોક્ટરોની સુરક્ષા માટે નેશનલ ટાસ્ક ફોર્સ બનાવવાનો પણ નિર્દેશ આપ્યો હતો.કોર્ટે બંગાળ સરકાર અને પોલીસ પર પણ ગંભીર સવાલો ઉઠાવ્યા હતા.અને અપરાધના સ્થળને સુરક્ષિત કરવામાં સક્ષમ ન હોવા બદલ પશ્ચિમ બંગાળ પોલીસને ઠપકો પણ આપ્યો હતો.
