હાઈલાઈટ્સ :
- ગુજરાતમાં અવિરત સાર્વત્રિક વરસાદથી સારો એવો જળસંગ્રહ
- રાજ્યની જીવાદોરી સમા સરદાર સરોવર નર્મદા ડેમમાં 87 ટકા જળસંગ્રહ
- રાજ્યના કુલ 207 જળાશયોમાં કુલ સંગ્રહ શક્તિના 78 ટકા જળસંગ્રહ
- રાજ્યમાં ગત વર્ષના 76 ટકાની સામે અત્યારે 78 ટકાથી વધુ જળસંગ્રહ
ગુજરાતમા આ વર્ષે ખૂબ જ સારો કહી શકાય તેવો વરસાદ થયો છે.અને તેથી જ રાજ્યના 207 જળાશયોમા 78 ટકા જળસંગ્રહ થયો છે.જે ઉનાળાના આકરા તાપમાં રાહતરૂપ સાબિત થઈ શકે છે,કારણકે સારા જળસંગ્રહથી જળસંકટ નહિવત જોવા મળશે તેવી આશા સેવાઈ રહી છે.
રાજ્યમાં મેઘરાજાની મહેરના પરિણામે મોટાભાગના તાલુકાઓમાં છેલ્લા બે દિવસમાં નોંધપાત્ર વરસાદ વરસ્યો છે.વરસી રહેલા આ સાર્વત્રિક વરસાદના ભાગરૂપે76 જળાશયો સંપૂર્ણ એટલે કે 100 ટકા જ્યારે 46 જળાશયો-ડેમ 70 થી 100 ટકા વચ્ચે ભરાતા હાઈ એલર્ટ જાહેર કરાયા છે.આ સિવાય રાજ્યના 23 ડેમ 50 ટકાથી 70 ટકા ભરાતા એલર્ટ અપાયું છે.જ્યારે 30 ડેમ 25 થી 50 ટકા વચ્ચે તેમજ 31 ડેમ 25 ટકાથી ઓછા ભરાયા છે.
ગુજરાતની જીવાદોરી સમાન સરદાર સરોવર યોજનામાં હાલમાં 2,90,547 MCFT એટલે કે કુલ સંગ્રહ શક્તિના 87 ટકા જળસંગ્રહ નોંધાયો છે.જ્યારે આ સિવાય રાજ્યના અન્ય 206 જળાશયોમાં 4,07,440 MCFT એટલે કે કુલ સંગ્રહ શક્તિના 72.73 ટકા જેટલો જળસંગ્રહ નોંધાયો છે આમ કુલ 207 જળાશયોમાં 78 ટકાથી વધુ જળસંગ્રહ થયો છે તેમ,જળ સંપત્તિ વિભાગના અહેવાલમાં જણાવાયું છે.
રાજ્યમાં ભારે વરસાદના પરિણામે સૌથી વધુ સરદાર સરોવર યોજનામાં 3.38 લાખ ક્યુસેક પાણીની આવક સામે 3.85 લાખ ક્યુસેક પાણી છોડવામાં આવી રહ્યું છે.જ્યારે વણાકબોરી જળાશયમાં 2.87 લાખ ક્યુસેક પાણીની આવક સામે 2.87 લાખની જાવક,ઉકાઈમાં 2.47 લાખ ક્યુસેક પાણીની આવક સામે 2.46 લાખની જાવક,આજી-4 માં 1.63 લાખ ક્યુસેક પાણીની આવક સામે 1.63 લાખની જાવક,કડાણામાં 1.50 લાખ ક્યુસેક પાણીની આવક સામે 1.25 લાખની જાવક તેમજ ઉંડ-1માં 1.19 લાખ ક્યુસેક પાણીની આવક સામે 1.19 લાખ ક્યુસેક પાણીની જાવક નોંધાઈ છે.આ સિવાય વિવિધ 94 જળાશયોમાં 70 હજાર ક્યુસેકથી એક હજાર ક્યુસેક સુધીની પાણીની આવક થઈ રહી છે.
આ ઉપરાંત મધ્ય ગુજરાતના 17 જળાશયોમાં 87 ટકા, દક્ષિણ ગુજરાતના 13માં 78 ટકા,સૌરાષ્ટ્રના 141 માં 66 ટકા,કચ્છના 20 જળાશયોમાં 61 ટકા જ્યારે ઉત્તર ગુજરાતના 15 જળાશયોમાં 39 ટકાથી વધુ પાણીનો સંગ્રહ થયો છે.આમ સરદાર સરોવર સાથે 207 જળાશયોમાં અત્યાર સુધીમાં 78 ટકાથી વધુ પાણીનો જથ્થો સંગ્રહાયો છે. ગત વર્ષે આ સમયે આ 207 જળાશયોમાં 76 ટકાથી વધુ જળસંગ્રહ નોંધાયો હતો તેમ,જળ સંપત્તિ વિભાગની યાદીમાં વધુમાં જણાવ્યું છે.
