કેન્દ્રિય ગૃહમંત્રી તથા સહકાર મંત્રી અમિત શાહે ગાંધીધામ-કંડલામાં ઇફ્કો ખાતે રૂપિયા ૩૫૦ કરોડના ખર્ચે તૈયાર થનારા વિશ્વના પ્રથમ નેનો DAP પ્રવાહી પ્લાન્ટનો શિલાન્યાસ કર્યો.આ પ્રસંગે મોટી સંખ્યામાં ઉપસ્થિત સહકારી ક્ષેત્રે જોડાયેલા ખેડૂતોને સંબોધન કરતાં તેમણે જણાવ્યું હતું કે, દેશભરમાં સહકારના માધ્યમથી ખેડૂતોને સમૃદ્ધ બનાવવાના નિર્ધાર સાથે વડાપ્રધાન નરેન્દ્ર મોદીના નેતૃત્વમાં પ્રાકૃતિક કૃષિને પ્રાધાન્ય સાથે નવી હરિયાળી ક્રાંતિ શરૂ થઈ છે.જ્યારે પેક્સના માધ્યમથી ગ્રામીણ અર્થતંત્રને મજબૂત બનાવવા આગામી પાંચ વર્ષમાં નવા ૩
લાખ પેક્સ એટલે કે પ્રાઇમરી એગ્રીકલ્ચરલ ક્રેડિટ સોસાયટી બનાવવાનો નિર્ધાર પણ વ્યક્ત કર્યો હતો.
ઈફકો પરિસરમાં નેનો DAP પ્રવાહી પ્લાન્ટનો શિલાન્યાસ કર્યા બાદ કેન્દ્રિય સહકારિતા મંત્રી અમિત શાહે ખેડૂતોને સંબોધતા જણાવ્યું હતું કે,વડાપ્રધાન નરેન્દ્ર મોદીએ સહકારિતા મંત્રાલય બનાવ્યા પછી દેશના ખેડૂતોને સમૃદ્ધ બનાવવાનો જે લક્ષ્યાંક રાખ્યો છે,તેમાં આજે ઈફકો પણ આ પ્લાન્ટના માધ્યમથી જોડાયું છે.
ઈફકોના નવા પ્રવાહી ખાતરથી અનેકવિધ ફાયદા ખેડૂતો તથા ખેતિક્ષેત્રને થશે.તેનાથી ધરતી માતા સુરક્ષિત થશે,જમીનમાં કેમિકલ અને ઝેર નહીં ભળે,ખેડૂતો સામે આજે જમીનને ફળદ્રુપ રાખવાનો જે પડકાર છે,તેમાંથી મુક્તિ મળશે.નેનો DAP પ્રવાહી જમીનમાં નથી ઉતરતું,માત્ર છોડમાં જ રહે છે.તેનાથી પાણી પણ પ્રદૂષિત નહીં થાય,ઉત્પાદન વધશે.વળી,તેનો ભાવ ઓછો હોવાથી ખેડૂતોને આર્થિક ફાયદો થશે.તેનાથી કેન્દ્ર સરકાર પર સબસિડીનો બોજ ઘટશે,યુરિયા ખાતરની આયાત ઘટશે અને ભારતને કૃષિ તથા ખાતર ક્ષેત્રે આત્મનિર્ભર બનાવવાનું વડાપ્રધાન નરેન્દ્ર મોદીનું લક્ષ્ય છે,તેમાં મદદ મળશે.
માત્ર દેશમાં જ નહીં,પરંતુ સમગ્ર વિશ્વમાં નેનો ખાતરના ઉત્પાદનની ઈફકોની પહેલને બિરદાવતા તેમણે કહ્યું હતું કે,આજે દેશમાં વડાપ્રધાન નરેન્દ્ર મોદીના નેતૃત્વમાં પ્રાકૃતિક કૃષિને પ્રાધાન્ય આપવાની સાથે નવી હરિયાળી ક્રાંતિના બીજ રોપાયા છે.દેશભરના વૈજ્ઞાનિકો,કૃષિ વૈજ્ઞાનિકોના સંશોધન,ખેડૂતોની મહેનત તેમજ વડાપ્રધાન મોદીના દૂરંદેશી નેતૃત્વમાં ભારત દેશ આજે અનાજ ક્ષેત્રે આત્મનિર્ભર બન્યો છે.
નવી હરિયાળી ક્રાંતિના ત્રણ લક્ષ્યો અંગે તેમણે જણાવ્યું હતું કે,એક,માત્ર ઘઉં-ચોખા જ નહીં પરંતુ ખાદ્યાન્નના તમામ ક્ષેત્રોના ઉત્પાદનમાં ભારતને આત્મનિર્ભર બનાવવું.બીજું,ખેડૂતનું પ્રતિ એકર ઉત્પાદન વધારવું તથા જમીનનું સંરક્ષણ કરવું.ત્રીજું પ્રાકૃતિક ખેતીના ઉત્પાદનોની નિકાસથી ખેડૂતોના ઘર સુધી સમૃદ્ધિ લાવવી. ઉપરાંત દેશને કૃષિક્ષેત્રે આત્મનિર્ભર બનાવવા સહકારી મંત્રાલયે ત્રણ મલ્ટી સ્ટેટ સહકારી સોસાયટીઓની રચના કરી છે,એમ જણાવતા અમિત શાહે કહ્યું કે,એક મલ્ટિસ્ટેટ સોસાયટી બીજ પ્રમાણિકરણ તથા સંવર્ધન માટે કામ કરશે.બીજી સોસાયટી ખેડૂતો દ્વારા ઉત્પાદિત પ્રોડક્ટસનું સર્ટીફિકેશન તથા માર્કેટિંગ માટે કામ કરશે.જ્યારે ત્રીજી સોસાયટી નાનામાં નાના ખેડૂતના ઉત્પાદનોને વિશ્વના માર્કેટમાં પહોંચાડવાના ક્ષેત્રે કામ કરશે.
જેનો સીધો નફો ખેડૂતોને મળશે.આમ સહકારના માધ્યમથી સમૃદ્ધિનું લક્ષ્ય સાર્થક થશે.
કેન્દ્રિય મંત્રીએ સહકારી ક્ષેત્રને વધુ મજબૂત અને સંગઠિત કરવા માટે સહકાર મંત્રાલય દ્વારા લેવામાં આવેલા વિવિધ પગલાંઓનો ઉલ્લેખ કરતાં કહ્યું હતું કે,પ્રાઇમરી એગ્રિકલ્ચરલ ક્રેડિટ સોસાયટી એટલે કે પેક્સના બાયલોઝમાં સુધારો કરીને મલ્ટિડાયમેન્શનલ બાયલોઝ બનાવ્યા છે. પેક્સ હેઠળ હવે પેટ્રોલ પંપ,દવાની દુકાન,સસ્તા અનાજની દુકાન,ડેરી,માછીમાર સમિતિ,બેન્કિંગ સહિતના વિવિધ આયામોને આવરી લેવામાં આવ્યા છે.તેમણે ખુશી સાથે 15 હજાર પેક્સ કોમન સર્વિસ સેન્ટર બન્યા હોવાનું આ તકે જણાવ્યું હતું.
આ સાથે આવનારા પાંચ વર્ષમાં ૩ લાખ નવા પેક્સ રજિસ્ટર કરી કૃષિ ક્ષેત્રને મજબૂતીની નવી ઊંચાઈ આપવામાં આવશે તેવી આશા તેમણે વ્યક્ત કરી હતી.આ સાથે પેક્સમાં કૃષિ પેદાશોને સ્ટોરેજની નવી સિસ્ટમ ઊભી કરવામાં આવશે.જેનાથી ટ્રાન્સપોર્ટેશનનો ખર્ચ બચી જશે.જેનો સીધો ફાયદો કિસાનોનો થશે તેમ કેન્દ્રીય સહકાર મંત્રી અમિત શાહે જણાવ્યું હતું.
કેન્દ્રિય મંત્રીએ રૂ.350 કરોડના ખર્ચે ઇફ્કોના નિર્માણ થનાર પ્લાન્ટ અંગે વિગતે માહિતી આપતા જણાવ્યું હતું કે,આગામી એક વર્ષમાં ત્રણ તબક્કામાં પ્રોડક્શન યુનિટ શરૂ થઈ જશે. આ યુનિટમાં 500 એમ.એલ.ની બે લાખ બોટલ પ્રતિદિન ઉત્પાદિત થશે.વર્ષે છ કરોડ નેનો DAP પ્રવાહી .
બોટલના ઉત્પાદનથી છ કરોડ DAP ખાતરની બોરીઓની આયાત નિવારી શકાશે અને ખાતર ઉપર સરકાર દ્વારા અપાતી 10 હજાર કરોડની સબસિડીનો બોજ પણ ઘટશે.જો કે આ સબસિડીથી બચેલી રકમ આખરે ખેડૂતો માટે જ ઉપયોગમાં લેવાશે.આજે સહકારી ક્ષેત્ર ખાતર વેચાણમાં મજબૂત સ્તંભ બનીને ઊભો છે.નેનો DAP પ્રવાહી ઉત્પાદનથી તે વધુ શક્તિશાળી બનશે,એમ તેમણે ઉમેર્યું હતું.
ઈફ્કોના ચેરમેન દિલીપ સંઘાણીએ પ્રાસંગિક પ્રવચનમાં વડાપ્રધાન નરેન્દ્ર મોદી અને કેન્દ્રીય સહકાર શ્રી અમિત શાહ દ્વારા ઇફકો સહિત સહકારી ક્ષેત્રને આપવામાં આવેલા સહયોગની સરાહના કરી હતી.ઇફકો દ્વારા ઉત્પાદિત થનાર નેનો ડી.એ.પી. થકી ભારતનું નામ સમગ્ર વિશ્વમાં ફર્ટિલાઇઝર ક્ષેત્રે રોશન કરશે તેવી આશા વ્યક્ત કરી હતી.સહકારથી સમૃદ્ધિ માત્ર સ્લોગન નથી પરંતુ તેને સાર્થક કરવા માટે સહકારી ક્ષેત્રમાં કેન્દ્ર સરકાર તેમજ રાજ્ય સરકાર દ્વારા કરવામાં આવેલા અથાગ પ્રયત્નોની તેમણે આ તકે વાત કરી હતી.ઇફકો દ્વારા ભૂકંપ,વાવાઝોડું કે કોરોના સહિત કુદરતી આફતો ઉપરાંત સામાજિક ક્ષેત્રે કરવામાં આવતી મદદનો પણ આ તકે ખાસ ઉલ્લેખ કરી ઇફકોની કામગીરી બિરદાવી હતી.
