રાજસ્થાનને આજે નવા સીએમ મળશે. આજે સીએમ ભજનલાલ શર્મા અને બે ડેપ્યુટી સીએમ દિયા કુમારી અને પ્રેમચંદ બૈરવા શપથ લેશે. કેન્દ્રીય નેતૃત્વ તરફથી લીલી ઝંડી મળ્યા બાદ મંત્રીઓની નિમણૂક કરવામાં આવશે. શપથ લેતા પહેલા રાજસ્થાનના નવા મુખ્યમંત્રી ભજનલાલે સૌથી પહેલા પોતાના માતા-પિતાના પગ ધોયા હતા. ત્યારબાદ સંત મૃદુલે કૃષ્ણ શાસ્ત્રીના ચરણોમાં નમન કરી આશીર્વાદ લીધા હતા. આ કાર્યક્રમમાં વડાપ્રધાન મોદી પણ હાજર રહેશે.
પ્રાપ્ત સમાચાર અનુસાર, વડાપ્રધાન મોદી કાર્યક્રમમાં હાજરી આપવા માટે બપોરે 12:10 વાગ્યે જયપુર એરપોર્ટ પહોંચશે. ત્યાંથી તેઓ લગભગ 12:30 વાગ્યે આલ્બર્ટ હોલ પહોંચશે. શપથ ગ્રહણ કાર્યક્રમ બપોરે 12.45 થી 1 વાગ્યાની વચ્ચે યોજાશે. ભજનલાલ શર્માના રાજ્યાભિષેકની સાથે જ બે નાયબ મુખ્યમંત્રી દિયા કુમારી અને પ્રેમચંદ બૈરવા પણ શપથ લેશે. રાજ્યપાલ કલરાજ મિશ્રા ત્રણેયને શપથ લેવડાવશે. જેમાં પીએમ નરેન્દ્ર મોદીની સાથે ગૃહમંત્રી અમિત શાહ, ભારતીય જનતા પાર્ટીના રાષ્ટ્રીય અધ્યક્ષ જેપી નડ્ડા, ભારતીય જનતા પાર્ટી શાસિત રાજ્યોના મુખ્યમંત્રીઓ, નાયબ મુખ્યમંત્રીઓ અને ઘણા કેન્દ્રીય મંત્રીઓ હાજર રહેશે.
ભજનલાલ શર્મા પહેલીવાર ધારાસભ્ય બન્યા છે. મંગળવારે પાર્ટીના કેન્દ્રીય નિરીક્ષકો રાજનાથ સિંહ, સરોજ પાંડે અને વિનોદ તાવડેની હાજરીમાં ભારતીય જનતા પાર્ટી વિધાનમંડળ પાર્ટીની બેઠકમાં તેમને મુખ્યમંત્રી-નિયુક્ત જાહેર કરવામાં આવ્યા હતા. વસુંધરા રાજેએ ધારાસભ્ય દળના નેતા તરીકે તેમના નામનો પ્રસ્તાવ મૂક્યો હતો. અજમેર ઉત્તરના ધારાસભ્ય વાસુદેવ દેવનાનીને સ્પીકર બનાવવામાં આવ્યા છે.
