મેંગલુરુ એરપોર્ટ અને એરક્રાફ્ટને બોમ્બથી ઉડાવી દેવાની ધમકી મળ્યા બાદ કર્ણાટકમાં ખળભળાટ મચી ગયો હતો. એરપોર્ટ અધિકારીઓને બુધવારે ઈમેલ દ્વારા આ ધમકી મળી હતી. મીડિયા રિપોર્ટ્સ અનુસાર, અધિકારીઓએ પોલીસને જાણ કરી, ત્યારબાદ એરપોર્ટ પર તપાસ શરૂ કરવામાં આવી, પરંતુ પોલીસને કંઈપણ શંકાસ્પદ મળ્યું નહીં. એરપોર્ટ અધિકારીઓની ફરિયાદના આધારે પોલીસે કેસ નોંધ્યો છે અને ઈમેલ મોકલનારની તપાસ કરી રહી છે.
‘ફનિંગ’ નામનું આતંકવાદી સંગઠન
ઈમેલ મોકલનારે પોતાની ઓળખ ‘ફનિંગ’ નામના સ્વ-ઘોષિત આતંકવાદી સંગઠન તરીકે કરી હતી. તેણે ઈમેલમાં લખ્યું છે કે એરપોર્ટની અંદર અને પ્લેનમાં વિસ્ફોટકો છુપાવવામાં આવ્યા છે, જે થોડા કલાકોમાં વિસ્ફોટ થશે. “હું તમને બધાને મારી નાખીશ. અમે ફનિંગ નામનું આતંકવાદી જૂથ છીએ,” આ માણસોએ ધમકીભર્યા ઈમેલમાં લખ્યું હતું. પોલીસે કહ્યું કે તમામ વિમાનો અને એરપોર્ટની અંદર કલાકો સુધી તપાસ કરવામાં આવી હતી, જેમાં કંઈપણ શંકાસ્પદ મળ્યું નથી.
એરપોર્ટની બહાર સુરક્ષા વધારી દેવામાં આવી છે
ધમકી મળ્યા બાદ પોલીસે એરપોર્ટની અંદર અને બહાર સુરક્ષા વધારી દીધી છે. એરપોર્ટમાં પ્રવેશતા પહેલા અનેક જગ્યાએ ચેકપોઈન્ટ ઉભા કરીને ચેકિંગ વધારી દેવામાં આવ્યું છે. જણાવી દઈએ કે આ મહિનાની શરૂઆતમાં બેંગલુરુની ઘણી શાળાઓમાં બોમ્બ હોવાની અફવા સામે આવી હતી. પોલીસ અધિકારીઓએ માહિતી મળ્યા બાદ શાળાઓને ખાલી કરાવી હતી અને સઘન તપાસ હાથ ધરી હતી. તપાસ બાદ ધમકી નકલી હોવાનું જાણવા મળ્યું હતું.
