કોંગ્રેસના પૂર્વ રાષ્ટ્રીય અધ્યક્ષ રાહુલ ગાંધીની ‘ભારત જોડો ન્યાય યાત્રા’ સોમવારે ઝારખંડના રામગઢ જિલ્લામાંથી ફરી શરૂ થઈ. પ્રદેશ કોંગ્રેસના પ્રવક્તા રાજીવ રંજને જણાવ્યું હતું કે, રવિવારે જિલ્લાના સિદ્ધુ-કાન્હુ મેદાનમાં રાત્રિ રોકાણ કર્યા પછી, યાત્રા સવારે મહાત્મા ગાંધી ચોકથી ફરી શરૂ થઈ અને ચુતુપાલુ ખીણ તરફ આગળ વધશે, જ્યાં રાહુલ ગાંધી સ્વાતંત્ર્ય સેનાની શહીદ શેખ ભીખારી અને ટિકૈત ઉમરો સિંઘને શ્રદ્ધાંજલિ આપશે.
તેમણે જણાવ્યું કે રાંચી જિલ્લાના ઇરબા પહોંચ્યા બાદ તેઓ ઇન્દિરા ગાંધી હેન્ડલૂમ પ્રોસેસ ગ્રાઉન્ડમાં વણકર સાથે વાત કરશે. બપોરના ભોજન પછી, યાત્રા રાંચીના શહીદ મેદાનમાં પહોંચશે જ્યાં કોંગ્રેસના સાંસદ જાહેર રેલીને સંબોધિત કરશે. રાહુલ ગાંધીએ રવિવારે કહ્યું હતું કે તેમની પાર્ટી ‘જલ-જંગલ-જમીન’ (જળ, જંગલ અને જમીન સંસાધનો) પર આદિવાસીઓના અધિકાર માટે છે. ઝારખંડમાં આ યાત્રા એવા સમયે ચાલી રહી છે જ્યારે જેએમએમના નેતૃત્વવાળી ગઠબંધન સરકાર સોમવારે વિધાનસભામાં વિશ્વાસ મત માંગશે. કોંગ્રેસ ગઠબંધનનો એક ઘટક છે.
રાહુલ ગાંધી સોમવારે તેમની ‘ભારત જોડો ન્યાય યાત્રા’ દરમિયાન ખુંટી જિલ્લામાં રાતવાસો કરશે. આ યાત્રા આઠ દિવસમાં રાજ્યના 13 જિલ્લામાંથી પસાર થઈને કુલ 804 કિલોમીટરનું અંતર કાપશે, જેને બે તબક્કામાં વહેંચવામાં આવશે. 14 જાન્યુઆરીએ મણિપુરથી શરૂ થયેલી આ યાત્રા 67 દિવસમાં કુલ 6,713 કિમીનું અંતર કાપવાનું લક્ષ્ય ધરાવે છે. તે 20 માર્ચે મુંબઈમાં સમાપ્ત થતાં પહેલાં 15 રાજ્યોના 110 જિલ્લામાંથી પસાર થશે.
