હેડલાઈન :
- બિહાર વિધાનસભા ચૂંટણી કોંગ્રેસ ‘ઇન્ડિયા’ ગઠબંધન હેઠળ લડશે
- બિહાર વિધાનસભા ચૂંટણી પહેલા કોંગ્રેસે ઔપચારિક નિર્ણય લીધો
- પાર્ટી પ્રમુખ મલ્લિકાર્જુન ખડગેની અધ્યક્ષતામાં મળી ઉચ્ચ સ્તરીય બેઠક
- દિલ્હી ખાતે કોંગ્રેસની ઉચ્ચ સ્તરીય બેઠકમાં લેવાયો આ પ્રકારનો નિર્ણય
- બેઠકમાં રાહુલ ગાંધી,બિહાર કોંગ્રેસના નેતાઓ,પદાધિકારીઓ હાજર રહ્યા
- ઉદ્દેશ્ય બિહારમાં ગઠબંધનની સ્થિતિ સ્પષ્ટ કરવાનો,રણનીતિ ઘડવાનો
બિહાર વિધાનસભા જીતવા માટે કોંગ્રેસ કદાચ એકલા હાથે જીતવા સક્ષમ નથી રહી,આ બાબત ત્યારે સ્પષ્ટ થાય છે કે દિલ્હી ખાતે બિહારના કોંગ્રેસ નેતાઓ સાથે મળીલી બેઠકમાં ઔપચારિક રીતે આગામી વિધાનસભા ચૂંટણી I.N.D.I.A ગઠબંધન બેઠળ લડવાનો નિર્ણય કરવામાં આવ્યો છે.જો કે અહી સવાલ એ પણ છે કે શું ઈન્ડિયા ગઠબંધનના અન્ય સાથી પક્ષો આ માટે કોંગ્રેસનો હાથ પકડશે કે કેમ ?
આગામી બિહાર વિધાનસભા ચૂંટણી પહેલા કોંગ્રેસે ઔપચારિક રીતે ‘ઇન્ડિયા’ ગઠબંધન હેઠળ ચૂંટણી લડવાનો નિર્ણય લીધો છે 25 માર્ચના રોજ નવી દિલ્હીમાં પાર્ટી પ્રમુખ મલ્લિકાર્જુન ખડગેની અધ્યક્ષતામાં મળેલી ઉચ્ચ સ્તરીય બેઠકમાં આ નિર્ણય લેવામાં આવ્યો.આ બેઠકમાં કોંગ્રેસના વરિષ્ઠ નેતા રાહુલ ગાંધી,બિહાર કોંગ્રેસના અગ્રણી નેતાઓ અને અન્ય રાષ્ટ્રીય પદાધિકારીઓ હાજર રહ્યા હતા.આ બેઠકનો મુખ્ય ઉદ્દેશ્ય બિહારમાં ગઠબંધનની સ્થિતિ સ્પષ્ટ કરવાનો અને આગામી ચૂંટણીઓ માટેની રણનીતિ નક્કી કરવાનો હતો.
બેઠક બાદ બિહાર કોંગ્રેસ પ્રમુખ રાજેશ કુમારે મીડિયાને સંબોધન કર્યું અને પાર્ટીના નિર્ણયની પુષ્ટિ કરી.તેમણે કહ્યું, ‘કોંગ્રેસ બિહારમાં ઇન્ડિયા એલાયન્સ સાથે સંપૂર્ણ જોડાણમાં ચૂંટણી લડશે.’અમારું મુખ્ય લક્ષ્ય ભાજપની આગેવાની હેઠળના ગઠબંધનને હરાવવાનું છે.બિહારમાં ભાજપ આપણો સૌથી મોટો રાજકીય હરીફ છે અને અમે તેને હરાવવા માટે અમારી બધી તાકાત લગાવીશું.તેમણે એ પણ સ્પષ્ટ કર્યું કે બિહારમાં મહાગઠબંધન સંપૂર્ણપણે એક છે અને અન્ય રાજ્યોની જેમ અહીં કોઈ મૂંઝવણ કે મતભેદ નથી.કોંગ્રેસ માને છે કે બિહારમાં ભાજપને સત્તા પરથી દૂર કરવા માટે બધા વિપક્ષી પક્ષોએ સાથે આવીને મજબૂત રણનીતિ બનાવવી પડશે.
જ્યારે બેઠકોની વહેંચણી અંગે પૂછવામાં આવ્યું ત્યારે રાજેશ કુમારે કહ્યું કે તેના પર વિગતવાર ચર્ચા કરવી હજુ વહેલું ગણાશે.તેમણે કહ્યું ‘જેમ જેમ ચૂંટણી નજીક આવશે તેમ તેમ ગઠબંધનના નેતાઓ એકસાથે આવશે અને એક નક્કર રણનીતિ બનાવશે અને બેઠક વહેંચણી અંગે અંતિમ નિર્ણય લેવામાં આવશે.’કોંગ્રેસના પ્રભારી કૃષ્ણા અલ્લાવારુએ જણાવ્યું હતું કે ‘મુખ્યમંત્રી પદના ઉમેદવાર અંગેનો નિર્ણય ‘ભારત’ ગઠબંધનના તમામ પક્ષોની બેઠક પછી લેવામાં આવશે.’
આ વાત જેટલી સરળ લાગે છે તેટલી સરળ નથી લાગતી કારણ કે ગઠબંધન હેઠળ ચૂંટણી લડવા માટે રણનીતિ તો આવશ્યક છે જ પરંતુ સૌથી પ્રથમ મુદ્દો બેઠક ફાળવણીનો રહેશે.અને તે માથાપચ્ચી કરવાની હજુ બાકી છે.ત્યારે જોવાનું એ રહેશે કે આ વિપક્ષનો આ સંઘ બનશે ? અને જો બનશે તો તે કાશીએ પહોંચશે કે કેમ ?
