એનિમલ ફિલ્મના વિવાદ અને બિઝનેસને લઇને સતત ચર્ચાઓ ચાલી રહી છે. ફિલ્મમાં રણબીર કપૂર અને બોબી દેઓલે જોરદાર એક્ટિંગ કરી છે. બંને કલાકારોએ એનિમલ ટાઈટલને યોગ્ય ઠેરવ્યું છે. ફિલ્મમાં રણબીર અને બોબીના પાત્રો કઝિન છે, પરંતુ એક શીખ છે અને બીજો મુસ્લિમ.
ઘણી વખત એનિમલને લઈને સવાલો ઉઠાવવામાં આવ્યા હતા કે શું ફિલ્મમાં વિલનને મુસ્લિમ તરીકે દર્શાવવો જરૂરી હતો. હવે ફિલ્મના નિર્દેશક સંદીપ રેડ્ડી વાંગાએ આ અંગે પોતાનું મૌન તોડ્યું છે. તેણે આમ કરવા પાછળનો પોતાનો તર્ક સમજાવતા કહ્યુ કે તેમણે ઘણીવાર લોકોને ધર્મ બદલતા જોયા છે. દિગ્દર્શકે કહ્યું, જ્યારે લોકો જીવનના નિમ્ન તબક્કામાં પહોંચે છે, તેમની સાથે ઘણું બધું થાય છે, ત્યારે તેમને લાગે છે કે આ તેમની નવી શરૂઆત છે, નવો જન્મ છે. સંદીપ રેડ્ડીએ એમ પણ કહ્યું કે તેણે ઘણીવાર લોકોને ઇસ્લામ અથવા ખ્રિસ્તી ધર્મ અપનાવતા જોયા છે, પરંતુ ભાગ્યે જ હિંદુ ધર્મમાં પરિવર્તન જોયા છે.
આગળ ઉમેરતા સંદીપે કહ્યુ કે અબરાર હકના પાત્રને એવી વ્યક્તિ તરીકે બતાવવા માંગતો હતો જેની ઘણી પત્નીઓ અને ઘણા બાળકો છે. આ કરવા માટે, તેણે અબરાર હકનું પાત્ર મુસ્લિમ તરીકે દર્શાવ્યું, કારણ કે ઇસ્લામ બહુવિધ લગ્નની મંજૂરી આપે છે. સંદીપ રેડ્ડીએ સ્પષ્ટ કર્યું કે વિલનને મુસ્લિમ બતાવવા પાછળનો તેમનો ઈરાદો ઈસ્લામને ખોટો બતાવવાનો નહોતો, તે માત્ર એનિમલ ફિલ્મમાં ડ્રામા ક્રિએટ કરવા માગતો હતો.
