એશિયાટીક સિંહએ ગુજરાતનું ગૌરવ છે. ત્યારે તેને જોવા માટે દર વર્ષે લાખોની સંખ્યામાં પ્રવાસીઓ આવતા હોય છે. ત્યારે આ વર્ષે પણ 1.93 હજારથી વધુ પ્રવાસીઓએ ગીર અભયારણ્યની મુલાકાત લીધી હતી. તો સાથે જ ગીરનું જંગલ વિદેશીઓનું પણ આકર્ષણનું કેન્દ્ર બન્યુ છે. ગત લર્ષે કુલ 6,497 વિદેશી પ્રવાસીઓએ ગીરની મુલાકાત લીધી હતી.
ત્યારે વન અને પર્યાવરણ રાજ્ય મંત્રી મુકેશ પટેલે જણાવ્યું કે ગુજરાતના ઘરેણા સમાન એશિયાટીક લાયનના જતન અને સંરક્ષણ માટે રાજ્ય સરકાર સતત પ્રયત્નશીલ છે. છેલ્લા એક વર્ષમાં ગીર અભયારણ્યની 1.93 લાખથી વધુ પ્રવાસીઓએ મુલાકાત લીધી છે.
વિધાનસભામાં ગીર અભયારણ્ય ખાતે પ્રવાસીઓની મુલાકાત અંગે પૂછાયેલા પ્રશ્નના પ્રત્યુતર મંત્રીએ ઉમેર્યું કે, છેલ્લા એક વર્ષમાં આ અભયારણ્ય ખાતે 1,93,415 પ્રવાસીઓએ મુલાકાતે આવ્યા હતા. જેમાં 1,86,918 અને 6,497 વિદેશી પ્રવાસીઓનો સમાવેશ થાય છે. જે પેટે રાજ્ય સરકારને રૂ. 4,92,00,350ની આવક થઇ છે. વધુમાં તેમણે ઉમેર્યું હતુ કે આ આવકનો ખર્ચ સિંહોના સંરક્ષણ, સંવર્ધન, બચાવ રાહત અને પ્રવાસીઓની સુવિધાઓમાં વધારો કરવામાં આવશે.
અભયારણ્યની મુલાકાતના બુકિંગ માટેના એક પૂર્વ પ્રશ્નના જવાબમાં ઉમેર્યું કે, પ્રવાસીઓએ મુલાકાત માટે www.girlion.gujarat.gov.in વેબસાઈટ પર ઓનલાઇન બુકિંગ કરવાનું હોય છે. આ બુકિંગમાં જો ભૂલ થાય તો એ માટે પ્રવાસીઓને રકમ પરત કરવામાં આવે છે. જેમાં મુલાકાત તારીખથી 10 દિવસ પહેલા મુલાકાતથી બુકિંગ કેન્સલ કરાવે તો 75% રકમ, 5 દિવસ પહેલા કેન્સલ કરાવે તો 50% રકમ, 2 પહેલા કેન્સલ કરાવે તો 25% રકમ પરત કરવામાં આવે છે. છેલ્લી ઘડીએ મુલાકાતે બુકીંગ કેન્સલ કરવામાં રકમ પરત કરવામાં આવતી નથી. તેમ તેમણે ઉમેર્યું હતું.
