વડાપ્રધાન નરેન્દ્ર મોદીએ સોમવારે (23 જાન્યુઆરી) અયોધ્યાથી પરત ફર્યાના કલાકો બાદ ‘પ્રધાનમંત્રી સૂર્યોદય યોજના’ની જાહેરાત કરી હતી. યોજના હેઠળ એક કરોડ ઘરોની છત પર સોલાર સિસ્ટમ લગાવવામાં આવશે. વડાપ્રધાન મોદીએ પોતાના સત્તાવાર ટ્વિટર હેન્ડલ પરથી ટ્વીટ કરીને આ જાણકારી આપી છે.
તેમણે લખ્યું છે કે, ‘સૂર્યવંશી ભગવાન શ્રી રામના પ્રકાશથી વિશ્વના તમામ ભક્તોને હંમેશા ઊર્જા મળે છે. આજે, અયોધ્યામાં અભિષેકના શુભ અવસર પર, મારો સંકલ્પ વધુ મજબૂત બન્યો છે કે ભારતના તમામ લોકોના ઘર પર તેમની પોતાની સોલર રૂફટોપ સિસ્ટમ હોવી જોઈએ. પીએમ મોદીએ લખ્યું કે, અયોધ્યાથી પરત ફર્યા બાદ મેં પહેલો નિર્ણય લીધો છે કે અમારી સરકાર 1 કરોડ ઘરો પર રૂફટોપ સોલર લગાવવાના લક્ષ્ય સાથે “પ્રધાનમંત્રી સૂર્યોદય યોજના” શરૂ કરશે. આનાથી માત્ર ગરીબ અને મધ્યમ વર્ગના વીજળી બિલમાં ઘટાડો થશે નહીં પરંતુ ભારત ઉર્જા ક્ષેત્રે આત્મનિર્ભર બનશે.
જણાવી દઈએ કે ગરીબ અને મધ્યમ વર્ગને પ્રધાનમંત્રી સૂર્યોદય યોજનાનો મહત્તમ લાભ મળવાનો છે. સમાજના આ વર્ગને હજુ પણ તેની આવકનો મોટો હિસ્સો વીજળીના બિલના રૂપમાં ખર્ચવો પડે છે અને છેલ્લા કેટલાક સમયથી દેશમાં વીજળીના મુદ્દે રાજકારણ પણ તેજ બન્યું છે. રાજકીય પક્ષો ક્યારેક મફત વીજળી આપવાના મુદ્દે તો ક્યારેક ઓછા દરે સામાન્ય લોકોને રીઝવવાનો પ્રયાસ કરી રહ્યા છે. આ યોજના દ્વારા સરકાર આવા મુદ્દાઓ પર રાજનીતિ કરનારાઓને જડબાતોડ જવાબ આપી શકે છે. પ્રધાનમંત્રી સૂર્યોદય યોજનાની જાહેરાત કરતી વખતે, વડાપ્રધાન મોદીએ એક કરોડ ઘરોની છત પર સોલાર સિસ્ટમ લગાવવાનું લક્ષ્ય રાખ્યું છે, તે શક્ય છે કે ભવિષ્યમાં ભારતના ગરીબ લોકો વીજળીના બિલમાંથી મુક્ત થઈ જાય. ટૂંક સમયમાં સરકાર આ અંગેનો રોડમેપ જાહેર કરવા જઈ રહી છે, જેમાં આ સોલાર સિસ્ટમ ક્યાં લગાવવામાં આવશે, તેને કેવી રીતે ઇન્સ્ટોલ કરવામાં આવશે, કેવી રીતે અરજી કરવી તેની સંપૂર્ણ માહિતી હશે.
